இரத்த புற்றுநோய் பற்றிய கட்டுக் கதைகளும் உண்மைகளும்..!

இரத்தப் புற்றுநோய் ஒருவருக்கு ஏற்பட்டால் கண்டிப்பாக அவரின் உயிருக்கு ஆபத்து என்பதில் எந்தவித மாற்றுக் கருத்தும் இல்லை. ஆனால் அதே சமயங்களில் தற்போது வளர்ந்துள்ள அதிநவீன மருத்துவ வசதிகளையும் சிகிச்சை முறைகளையும் கொண்டு இரத்த புற்றுநோயால் பாதிக்கப்பட்டவர்களை கண்டிப்பாக காப்பாற்ற முடியும். இரத்த புற்றுநோயால் பாதிக்கப்பட்ட பல்வேறு நோயாளிகளும் சரியான சிகிச்சை எடுத்துக் கொள்வதன் மூலம் தங்கள் வாழ்நாளை நீட்டித்துக் கொள்வதோடு சிலருக்கு இரத்தப் புற்றுநோயானது முழுவதும் குணமாகி உள்ளதும் குறிப்பிடத்தக்கது. அதற்கு ஆரம்ப கட்டத்திலேயே இரத்த புற்றுநோயை கண்டறிவதும், சரியான சிகிச்சை எடுப்பதும் இரத்த புற்றுநோயை விரைவில் குணப்படுத்தும் உதவும்.

பலரும் குறிப்பிட்ட பழக்கவழக்கங்களையும் வாழ்க்கை முறையினையும் பின்பற்றுவதால் இரத்த புற்றுநோய் ஏற்படாமல் தற்காத்துக் கொள்ள முடியும் என நம்புகிறார்கள். ஆனால் உண்மையிலேயே தற்போது வரை இரத்த புற்றுநோயை வரும் முன்னரே காத்துக் கொள்வதற்கு எந்த ஒரு வழியும் கண்டறியப்படவில்லை. இரத்தப் புற்றுநோய் மரபணுவில் ஏற்படும் மாற்றங்களினால் உண்டாவதால் அதனை நம்மால் எளிதில் தடுக்க இயலாது. அதே சமயத்தில் சில குறிப்பிட்ட வகை வேதிப்பொருட்கள் அல்லது கதிரியக்கங்களுக்கு அதிக அளவு உட்படும் போது அவை இரத்த புற்றுநோய் ஏற்படும் வாய்ப்பை அதிகரிக்கின்றன. எனவே இதுபோன்றவற்றிலிருந்து விலகி இருப்பதன் மூலம் புற்றுநோய் ஏற்படும் வாய்ப்பை நம்மால் குறைக்க முடியும்.